السلام عليكم ورحمة الله وبركاته
بداية أحب أشكر القائمين على هادا الموقع اللي اتمنى إنو يكون مرجع لكل شخص محب للكائنات الجميلة دي ,,
موضوعي حيكون عن معلبات القطط زي ما أنا موضحة بالعنوان , من اول ما جبت قطي وانا كنت خايفة من أكلو , إيش حأكلو ؟ وإيش الأكل المفيد لو ولصحتو ؟
وفالبداية بحكم اني مبتدئة نزلت السوبر ماركت وما كان موجود غير ( الويسكاس ) أخدتو على طول من غير تفكير , طبعا مو العلبات لا , أخدت الدراي فود ,
ولما رجعت البيت عملت بحث عنو , بس اتفاجأت بالكم الهائل من الناس اللي تحذر منو *_* !!! رغم انو سنفوري مرة حبو ويغلقو بسرعة ما شاء الله ,
أنا ماهمني كلام الناس المهم انو سنفور حب الويسكاس
وكنت أأكلو كمان أكل تاني طبعا , ومرة لما نزلت السوبر ماركت لقيت جمب الدراي فود معلبات وبرضو من نفس الشركة ( ويسكاس ) واخدتها على طول
ولما فتحتها عشان أديها سنفور ريحتها كانت مقرفة بشكل مو معقووول :/ , وعلى طول طليت فتاريخ الانتهاء لقيتها منتهية من فترة طويلة
.
ومن بعدها سرت ما أكلو معلبات ابدا , ولاحظت انو الله يكرمكم سنفور بيستفرغ :""( ومع فضلاتو تكرمو بينزل دم ,
ووديتو للدكتور قلي دي الفترة وقفي دراي فود الين مايتحسن واداني ادوية وقلي اكليه زبادي مع الدجاج الني .
من بعدها بدأت أخد حذري من الويسكاس , وفي مرة نزلت " كارفور " مالقيت الويسكاس لقيت نوعية تانية , المعلبات كانت " فانسي فيست " والدراي فود كان " فريسكاس " .
قلت خليني اخد وأجرب خاصة اني سمعت كتيرين بيمدحو الشركتين دي
المفاجآة كانت انو من بعد ما سار ياكلو سنفوري شعرو خف تساقطو , وماسار ابدا يستفرغ الحمدلله والدم ما سار ينزل =)) , وريحة المعلبات جدا جدا جميلة وتحسيها نضيفة ,
أفتكر أول ما جبت المعلبات وغرفت لسنفوري فصحنو أختي سألتني انتي بتأكليه من التونا حقتنا !!! , لأنو الريحة مرة تشبه ريحة التونا العادية ..
صراحة ما أحب أتكلم على أي شركة أو على أي منتج بس دي تجربتي وحقيقي أتمنى الكل يستفيد , واللي عندو أي خبرة أو أي شئ بخصوص الموضوع يفيدنا كمان .
صورتلكم " الفانسي فيست "
ودي صورة المعلبات
اما " الفريسكاس " للأسف غلق واليوم لما نزلت كارفور مالقيت منو :"((
ومرة زعلت , أتمنى اللي من المدينة ويعرف أماكن تبيع أكل البسس من كل المنتجات يبلغني
وشكرا ^_^
أعتذر عن الإطالة =))
الرئيسية
